מאָנאַש־אוניווערסיטעט שטעלט אָן צוויי ייִדישיסטןMonash University Hires Two Yiddishists
דוד סלוצקי און רבֿקה מאַרגאָליס זענען ביידע היסטאָריקער פֿון ייִדיש־רעדנדיקע אימיגראַנטן און זייערע קולטורעלע באַוועגונגען
Image by University of Ottawa
You can hear this article read by Rukhl Schaechter, by clicking below
מע קען זיך צוהערן צו אַנדערע אַרטיקלען פֿונעם פֿאָרווערטס פֿאָרגעלייענט דורך שׂרה־רחל שעכטער, ווי אויך אַנדערע פֿאָרווערטס־רעקאָרדירונגען, דורכן קוועטשן דאָ.
דער „אויסטראַלישער צענטער פֿאַר ייִדישער ציוויליזאַציע‟ בײַם מאָנאַש־אוניווערסיטעט אין מעלבורן האָט לעצטנס געלאָזט וויסן, אַז מע האָט אָנגעשטעלט אויף פֿולצײַטיקע פּאָזיציעס צוויי פּראָפֿעסאָרן וואָס פֿאַרנעמען זיך מיט דער געשיכטע פֿון ייִדיש־רעדנדיקע ייִדן.
ד”ר רבֿקה מאַרגאָליס, וואָס אַרבעט איצט בײַם אָטאָווער אוניווערסיטעט, איז אַ היסטאָריקערין און ייִדיש־לערערין, באַקאַנט פֿאַר אירע פֿאָרשפּראָיעקטן, אַרטיקלען און בוך וועגן די ייִדן אין מאָנטרעאָל, Jewish Roots, Canadian Soil. זי וועט אין פֿעברואַר אָנהייבן ווי די נײַע דירעקטאָרשע פֿונעם „אויסטראַלישן צענטער פֿאַר ייִדישער ציוויליזאַציע‟, וואָס ווערט באַטראַכט ווי דער הויפּטאַדרעס פֿאַר יודאַיִסטיק אין אויסטראַליע. זי וועט דערצו איבערנעמען די קאַטעדרע פֿאַר ייִדישער ציוויליזאַציע אויפֿן נאָמען פֿון דער „פּראַט־פֿונדאַציע‟.
צוזאַמען מיט איר וועט, אויך אין פֿעברואַר, אָנהייבן לערנען ד׳׳ר דוד סלוצקי ווי אַן אַסאָציִיִרטן פּראָפֿעסאָר פֿונעם הײַנטצײַטיקן ייִדישן לעבן און קולטור. סלוצקי, וואָס איז אויפֿגעוואַקסן אין דער מעלבורנער בונדישער סבֿיבֿה און האָט באַקומען זײַן דאָקטאָראַט פֿון מאָנאַש־אוניווערסיטעט, אַרבעט די לעצטע פּאָר יאָר אין טשאַרלסטאָן, דרום־קאַראָלינע, ווי אַ פּראָפֿעסאָר פֿון יודאַיִסטיק. דער יונגער היסטאָריקער פֿאַרנעמט זיך מיט דער געשיכטע פֿונעם „בונד‟, מיטן ייִדישן לעבן אין אויסטראַליע און אירע אינסטיטוציעס און מיט דער געשיכטע פֿון די מעלבורנער בונדיסטן. ער איז אויך דער מחבר פֿון אַ ביכל זכרונות וועגן זײַן באַציִונג מיטן טאַטן, דעם פֿאַרשטאָרבענעם בונדישן כּלל־טוער שמואל „סלאָגאָ‟ סלוצקי. דאָס בוך שילדערט די געשיכטע פֿון די מעלבורנער בונדיסטן און זייערע פּוילישע פֿאָרגייער.
דער „צענטער פֿאַר ייִדישער ציוויליזאַציע‟ בײַם מאָנאַש־אוניווערסיטעט פֿירט אָן מיט ייִדיש־קלאַסן אויף דרײַ ניוואָען, און גיט די סטודענטן די ברירה אויסצוקלײַבן ייִדיש ווי אַ בײַלימוד. אַחוץ די קלאַסן אָרגאַניזירט דער צענטער פֿאָרשפּראָיעקטן פֿאַרבונדן מיט דער געשיכטע פֿון די ייִדיש־רעדנדיקע ייִדן אין מעלבורן און ייִדישע פּאָעטן.
מאָנאַש־אוניווערסיטעט טראָגט דעם נאָמען פֿונעם אויסטראַלישן גענעראַל דזשאָן מאָנאַש, אַ קינד פֿון פּרײַסישע ייִדישע אימיגראַנטן, וואָס איז געבוירן געוואָרן אין מעלבורן. מאָנאַש, וואָס האָט געהאָלפֿן די אויסטראַלישע מיליטערישע כּוחות צו באַזיגן די דײַטשן בעת דער ערשטער וועלט־מלחמה, ווערט באַטראַכט ווי דער וויכטיקסטער גענעראַל אין דער אויסטראַלישער געשיכטע. עטלעכע שטעטלעך אין אויסטראַליע און אַפֿילי אַ דאָרף אין ישׂראל הייסן נאָך אים.
A message from our CEO & publisher Rachel Fishman Feddersen
I hope you appreciated this article. Before you go, I’d like to ask you to please support the Forward’s award-winning, nonprofit journalism during this critical time.
At a time when other newsrooms are closing or cutting back, the Forward has removed its paywall and invested additional resources to report on the ground from Israel and around the U.S. on the impact of the war, rising antisemitism and polarized discourse.
Readers like you make it all possible. Support our work by becoming a Forward Member and connect with our journalism and your community.
— Rachel Fishman Feddersen, Publisher and CEO
